பட்ட மரத்தின் வேதனை

வறட்சி காலத்தில் ஊர்க்கோடியில்
இலைகளற்ற நிலையில் இருக்கும் எனக்கு
என் வாழ்வுக்கு ஆதாரமாம் மழைக்கு
காரணமான என் சக தோழர்களை
அழித்து என்னை தனி( பட்ட) மரமாக்கிய
நீங்களே அவ்வாறு அழைப்பதைக் கேட்கும்
வேதனையை விட நானும்
அவர்களுடன் வெட்டுப்பட்டு
மடிந்திருக்கலாமே ! ! !

அரசுப்பேருந்து

கால் கடுக்க ஒரு மணித்துளியாய்
காத்திருந்தேன் குறைவு கட்டண
அரசுப்பேருந்துக்காக. . . .
வந்தது அரசுப்பேருந்தும் ஆடி  அசைந்து
"சொகுசுப்பேருந்து" என்ற பலகையுடன்
அதிக கட்டணத்தில். . . .

கல்விச்சுமை

கல்வியே  சுமையாய்
கருதப்பட்டது அந்நாளில்
வறுமை மற்றும் அறியாமையால்
அதே கல்வி சுமையாய்
கருதப்படுகிறது இந்நாளில்
புத்தகம் மற்றும் ஏடுகளின் பளுவால்
அந்நாள் இந்நாள் என்றில்லாமல்  என்றுமே
கல்வி சுமை தானோ ! ! !

பிறந்த வீடு

திருமணத்திற்கு பின் விசேச காலத்தில்
பிறந்த வீட்டிற்கு வருவாள் பெண்
கோடைக்கு பின் மழைக்காலத்தில்
தாய்நிலம் தேடி வருகிறது மழை
மழைக்கு நிலம் தான் பிறந்த வீடோ! ! !